- FATAH.PS - Ala Une - 23/Aug 16:48

المشكلة بينا وبينكم افكاركم ومعتقداتكم ومناهجكم,

الارض والتاريخ في صفحاته الملطخة بالعار . Dr-Ahmed H. Hilles  بدهم مني أبيع الناس أوهام وخزعبلات, وأضلل الشعب واكذب عليه, بدهم مني ارفع معنويات الناس بالهبل والخداع, بدهم أمارس تجاه الناس التخدير والكذب, بدهم مني أستخدم البنج تجاه الجبهة الداخلية بالكلام الفاضي والشعارات الرنانة والمزوقة, الكلام المعسول والمعزول عن الواقع والمفصول عن الحقيقة, كلام في واد والواقع كلو في واد تاني خالص, بدهم مني أكون زيهم, واحكي زيهم, وأمارس التزوير للحقائق زيهم, بدهم اعمل بالضبط إلي مارسوه على مدار 17 سنة مع الناس البسيطة, بيحكوا معي على الخاص, دكتور حاول تهدي الناس وترفع معنوياتهم, حاول تحصن وتقوي الجبهة الداخلية, يا رجل انتا بعقلك؟؟ بحكي جد بعقلك ولا مش بعقلك؟؟ يا رجل احنا بنموت كل يوم مليون مرة, المجازر في كل مكان, صرنا متنقلين عشرين مرة عشان ننجوا بأطفالنا ونسوانا الي ما الهم أي ذنب في الي بصير, الكذب والبلاغة والنحو والصرف والشعر والحكم والامثال ما بتحصن جبهة داخلية ولا بتهدي بال الناس, الكلام المصفط والعربي الفصيح تبع أيام الجاهلية ما في منه أي فايدة مع الموت والدمار والمصيبة الي احنا فيها, افهم دخيل الإسلام انا, افهم يخرب بيت مخك, يا رجل احنا في كارثة, احنا ورطنا ورطة العمر, يعني الأفلام الهندية الي كنتوا تمارسوها على الناس في الماضي مستحيل تقنع نملة اليوم, الناس ماتت بالآلاف, الناس اتقطعت ايديها ورجليها بعشرات الآلاف, الناس انحرقت وانفرمت تحت سقوف بيوتها, الناس اتدمرت مصالحها وضاع تعب عمرها كلو, الناس انشوت وهي بتسأل عن مالها في غزة والشمال, ومليون تليفون بتعمل في اليوم عشان تتطمن على البيت وعلى الدكان وعلى المصنع وعلى الشركة وعلى المطعم وعلى المكتب وعلى الشقة وعلى العمارة, وكل شوية بيموت منها شقفة, كل ما بيوصلها خبر انو في اشي انهدم او انقصف او انحرق او انسرق,,, مصالح الناس ابيدت ابادة, والعايش حاليا بيموت ميت موتة كل يوم من الخوف, كل يوم 200 شهيد واكتر من 500 جريح, انتا متخيل الي بيصير, القصف شبه عشوائي, ما بتعرف وين الضربة بتيجي وفي أي لحظة راح يحصل القصف, انتا نايم, انتا مارق, انتا ماشي, انتا في الشارع, انتا عند حد, انتا عندك حد, فجأة اشي عملاق بيشفطك شفط وبيلزقك في الأرض, وبتعتم الدنيا واشي بيكتم على نفسك, هدا اذا ضايل الك نفس, وساعتها اسمع اصراخ امك حبيبتك واولادك ومرتك واخوتك وحبايبك, هادا اذا ضل حدا عايش فيهم, واقعد حاول ترفع السقف عن رجليك وعن اهلك, كتير ماتوا لانه ما في مساعدة ولا في إمكانات, كل يوم بيموتوا الناس, والعايش حاليا لانه محظوظ, وبتلاقيه مقهور من الذل والجوع والعطش والحرمان... نايم في الشوارع, هو ومرته وأولاده وامه في الشوارع, فعليا اقسم بالله العظيم الناس نايمة في الشوارع, من غير ملابس ولا مية ولا اكل ولا كرامة ولا زفت, وبتحكيلي ابيع الناس أوهام, اخدع الناس, اضحك عليهم, يا بني آدم الحقيقة الي انتا وجماعتك ما بدك تشوفها هيا انو غزة انتهت فعليا, انطحنت بالكامل, تم تدميرها كليا, بسببك وبسبب افكارك وخططك ومشاريعك الفاشلة, وتقييماتك الغلط, ومغامراتك الهبلة, المشكلة بينا وبينكم, افكاركم, معتقداتكم, مناهجكم, ما بدكم تشوفوا الأمور من زوايا مختلفة, المرونة عندكم صفر, والمصالح الحزبية فوق كل الاعتبارت, عشان هيك مستحيل تفهم كلامي, ومستحيل نتفق مع بعض, حفظوك اكم اية واكم حديث واكم بيت شعر بتفكر حالك صرت امام  المرسلين, المبعوث نور للعالمين, ورحمة للبشرية, وكل من دونك كفرة وعملاء وجواسيس وخونة واولاد كلب, كل من لا يهتف لك ولحركتك بلبيك يا حركتنا فاسق وحقير.... المطلوب الان وقف الحرب بأي ثمن, بأي طريقة, بأي وسيلة, وما تسألني كيف, ولا مطلوب مني احكيلك كيف, أصلا ما بعرف كيف, الي بلش المشورع الرباني الي احنا فيه, وظيفته يوقفه, وظيفته يفعل الخطط البديلة الي اعدها لهيك حال, يبهرنا بعبقريته في إدارة الطوارئ والكوارث ويوقف هالمصيبة... .