Maroc - LA NUEVA ESPANA - Viaje a la Ópera - Aujourd'hui 02:00

El bable en Manhattan

La noticia del cursu de llingua asturiana programáu pol Institutu Cervantes de Nueva York pal mes que vién tien un interés de primer orden y por ende nun ye raro que tenga a los medios ente la sorpresa y l’asombru. ¿Pero qué ye esto? La más alta institución qu’esparce pol mundu l’estudiu y la presencia práctica del castellán como idioma español preocúpase agora de facer lo mesmo cola llingua asturiana? ¿Y equí síguese negándo-y al asturianu’l caráuter oficial que la Constitución permite? Vamos con orden. L’Institutu Cervantes sabe que trabaya con y por una llingua d’España, la que ta más extendida nel mundu y que tien un futuru institucional tovía por algamar como merez. O seya que’l castellán ye mui importante. Pero, amigues, el Cervantes sabe que nel democráticu estáu español hai otres llingües de menor tamañu pero d’una virtual y posible intensidá como la que ya tien fortunosamente’l castellán. Por eso’l Cervantes atiendi y sofita tamién a les otres llingües españoles consistentes, seyan oficiales o non. Esa ye la realidá na que se basa l’alcuerdu de la Conseyería de Cultura, Política Llinguística y Deporte del nuestru gobiernu col Institutu Cervantes que fai que’l 25 de ochobre entame nel CUNY, The City University of New York, el cursu "Introduction to Asturian Language and Culture". La información que la Conseyería da del eventu ye llarga y granible, con un puntu d’arguyu sigún la novedá y el sitiu onde se cellebra. De fechu quien la llea alcontrará l’anunciu enteru de les actividades próximes del Cervantes neoyorquín, onde atopará los detalles del cursu sobre la nuestra llingua y cultura. Y el tonu de la voluntá política del Gobiernu d’Asturies nun pué ser más claru y decidíu: quier que se faiga esi cursu a la fin "de internacionalizar y promocionar la llingua asturiana".